RSS

“بين الاعلام الترابولى و نظرية الكامبوشو ” قصه بتنجانيه

فتحت التلفزيون وطبعا كالعاده على قناة الفراعين (لانى كنت فاتحها بليل بتفرج على عالم العلماء الجليل عم توفيق وتحليلاته المبهره و الممتعه ) المهم لقيت برنامج على قناة الفراعين اسمه أهلا يا دكتور بيتكلم على مشاكل الحمل !! قولت فكك اقلب ياعم نشوف اخر الاخبار عينى جت على القناة الاولى صدفه فقولت اشوف فيه ايه واذ بي افاجا (خدت بالك انت من واذ دى خطيره على فكرة ) ان الثوار اتحولو لبلطجيه فقط و عمالين يدمرو فى ممتلكات الدوله و الجيش واقف مش بيحتك بحد دمى فار اه يا ولاد … عالم عايزه الحرق الجيش المفروض يطلع عينهم همه و اللى جبوهم وبعض التعليقات العابره من الجيران بشتايم فظيعه للثوار و الثوره و المجلس العسكرى اللى سايب شوية عيال يبوظو البلد

قولت اشوف قناه تانيه روحت لقناه الحياة لقيتهم بيتكلمو عن الكتب اللى اتحرقت وتراث مصر اللى بيضييييع طبعا مهو اصلهم شوية بلطجبيه عايزين الحرق و الجيش المفروض يمسكهم ويدبح فيهم

قلبت على قناة اون تى في وكان امنية جميع مشاهدين التلفزيون الوطنى امانيهم تحققت فى لحظة وان الجيش بيضرب فى الناس و هيطلع عينين اللى جابوهم بس تفاجأ ان اللى بيتضربو مش البلطجية و العيال اللى بتضرب شكلهم ولاد ناس و ان مفيش بلطجيه بتضرب و لسان حال المذيع الثوار بيموتو فى الشوارع الحقوهم طبعا الواحد اتصدم من المناظر وقعد يسب في المجلس العسكرى و العسكر اللى سايبين البلطجيه وبيضربو الناس

قولت حاجه تقرف بلاش قرف ده اعلام قذر انا اجيب مودرن سبورت اشوف عليها ايه لقيتلك عم شلبوكه حبيب المصريين قاعد وبيفتى كالعاده مع شلة الانس بتاعته

قولت عليك وعلى النت هتلاقي المخلص وكل اللى فى نفسك هتلاقيه لقيت نفس الكلام برضو ومحدش عارف الدنيا ماشية ازاى وكلو عمال يفتيلك اتناقشت مع كذا واحد توصلت فى النهايه اننا نولع فى الثورة و البلد بالشعب على المجلس العسكرى مرورا بالايادى الخفيه و الاصابع و كل الشغل ده

قولت اشطه لقد دقت الساعه ال 11 عليك وعلى العلامه بتاعنا عم نوفيق عكاشة و التحليلات الخارقه للموقف بغض النظر عن تشنجاته الغريبه وكلامه اللى زى الزفت انا عمرى مشوفت برنامج عرض الخبر فيه اكبر من التعليق وكان اللى بيقرا العناوين هو اللى بيحلل الخبر اما الحج توفيق بيكرر نفس الكلام بعد ما يحط بهراته الخارقه عليه غير بقا الاتصالات بس الحق يقال الراجل بيجيب حجات مش بنشوفها فى اى حته ولا حتى التلفزيون المصرى وخصوصا خبر المدفع المضاد للطائرات اللى اتمسك فى السويس مع بلطجية مش عارف البلطجيه ولاد الجنية دول كانو ماشيين بيه ازاى فى الشارع وخبر حريق المجمع الجغرافى اللى بناه محمد على سنة 1875 مع العلم ان محمد على اتوفى سنة 1845 🙂 عادى كل شئ ممكن مع الحج توفيق

هى ربع ساعه وسيبته يكمل جنون و قولت اروح اقعدلى على النت حبه لقيت الحرب الشعواء بتاعت كل مرة على الاسلاميين وخصوصا الاخوان كالعاده اوبااا كلو طلع من الكمبوشو على راي الحاج شوبير وكان الناس كانت مستنيه تسمع كلمة الاخوان عشان يبدأو الحرب عليهم وعلى موقفهم (المخزى على حد تعبيرهم )وانهم باعو دم شهدائنا عشان الانتخابات والهرى الكتير ده

بعد ما زهقت من الليله دى كلها توصلت بان سبب الهليله دى 3حجات الاعلام و المجلس العسكرى و الثورجية البلطجيه الثلاث حجات دول اتعاونو مع بعض وطلعولنا الصورة اللى زى الزفت دى

بعد كده انقسم الناس ل3 اجزاء برضو جزء مع المجلس العسكرى وبيؤيده ويقوده جهبذنا توفيق عكاشة من العباسية و الجزء الثانى دمه غلى ونزل التحرير يعتصم عشان يدافع عن الشهداء و الجزء الثالث قاعد فى بيته معترض على الى بيحصل سواء من الضرب اللى من طرف الجيش و برضو ضد المظاهرات ودول انا بنتمى ليهم

واحد صاحبي اسمه محمد حطبه سمعت الكلمه دى منه وعجبتنى اوى “اللي بيفكر في السياسة بعيدا عن قوة الشعب و الأمن و التدخلات الأميركية و المؤامرات الأجنبية يبقى مابيفهمش في السياسة”

بعد ما توصلت لكده و الدنيا وضحت قدامى حمدت ربنا على نعمة العقل ودخلت نمت تصبحو على خير بقا طولت علييكم 🙂

والسلام عليكم ورحمة الله

 
أضف تعليقاً

Posted by في ديسمبر 23, 2011 in قصص بتنجانية

 

اعتبره أب يا اخى

متتفلقش ولا يطقلك عرق لما تسمع اعتبره اب يا اخى على حسنى مبارك ولا حتى لما يقولك انا ضد مبارك كرئيس فاسد بس انا بعتبره رمز للبلد و كان يوم في الايام رئيس جمهورية مصر فمن الاهانه اننا نحاكمه واللى يطلع يعيبطلك ويصوتلك في التلفزيون كانك بتتفرج على وصلة هبل وعبط ساذجه بتقولك تف عليا واطفي التلفزيون وخش نام

الله يرحمه الشيخ الشعراوى قال: حينما ترى المجرم يُحاَكم لا تنظر اليه وتشفق عليه، بل انظر الى جريمته

والله الله يرحمه قالها حكمة

مش نقعد نقول يا عينى ده حد طيوب و نعيط جنبيه ونقول حرام يتحاكم ده كل بنى ادم خطاء وبتل من ابتال حرب اكتوبر وكلام بتاع

فيه فرق بين خطا عفوى غير مقصود او بيكون خارج وعيه اثناء خطاه و خطا مقصود وبيكون في وعيه اثناءه

المتهم محمد حسنى السيد مبارك (كانت حلوة اوى من بق القاضي :)النهار ده ) اخطا واذنب على مدار 30 سنة متواصله من اختلاسات و ظلم علنى و قتل و اتجار بمشاعر الناس ……..الخ كل الاخطاء دى مش اخطاء سهله عشان يتسامح فيها وكان يخطا بكامل قواه العقليه بل ويرغب في الزياده و الاكثار من الخطأ و التوحش مينفعش نيجى نقول بعد كده حرام افتكروله حاجه حلوة ….. دى تبقا سذاجه مفرطة

ونعمل كده في انسان كان بيمثل مصر في يوم من الايام ؟؟؟ ااااااه ومش يوم من الايام بس لا ده 30 سنة عاشتهم مصر في حالة تردى ثقافي و فكرى و مجتمعي يرثي لها و بنعمل كده عشان نطهر تاريخ مصر من امثاله ومن اى واحد يحاول او حتى يفكر يعمل حاجه من اللى عمله عشان يبقا عبرة لكل امثاله من الفاسدين

في الاخر ( محاكمة مبارك ليست اهانة لمصر بل فخر لكل مصرى وعربي على مر التاريخ )

 
9 تعليقات

Posted by في أغسطس 4, 2011 in ده رأيى